Mandrinatzeko makina edo mandrinagailua makina-erreminta konbentzionala da, eta forma kubikoko piezak mekanizatzeko erabiltzen da, tolerantzia estuekin eta kalitatezko akaberak lortu nahi direnean. Nola dago osatuta mandrinatzeko makina bat? Zer atal ditu? Nola funtzionatzen du?
Mandrinatzeko makinaren funtzionamendua
Pieza kubikoak mekanizatzeko, pieza lan-mahaian jartzen da, eta, bitartean, mandrinatzeko erreminta biraraziko da. Erreminta makinaren erreminta-euskarriko ardatz nagusiari lotuta dago, eta bertan sortzen da lanerako behar den abiadura. Abiadura hori aldatu egiten da mekanizatu nahi den material motaren arabera, baita piezaren gaineko aitzinamendu axialaren arabera ere. Mandrinatzeko makinaren ezaugarri bat da bertan egiten diren mekanizazio-prozesuak garestiak direla. Horregatik, garrantzitsua da mandrinatzeko erreminta egokia aukeratzea, denbora ahalik eta gehien murrizteko eta mekanizazio zehatza eta kalitatezkoa lortzeko.
Zer da mandrinaketa? Eta zer da mandrinatzeko makina? Mandrinaketa pieza jakin batzuetan egiten den mekanizazio mota bat da, gainazalean zehaztasun handiagoa eta zimurtasun txikiagoa lortzeko; normalean, zulo zilindrikoak edo konikoak dituzten piezak mekanizatzen dira. Eragiketa hori barne-hariak egiteko ere erabiltzen da.
Esandakotik ondorioztatzen da mandrinaketa-lanak egiteko gai den makina mandrinatzeko makina edo mandrinagailua dela. Makina oso bereziak dira, eta oso tolerantzia txikiak eta mekanizazio-kalitate zehatza izan behar dituzte. Mandrinatzeko makinek eremu oso estuetan lan egin dezakete.
Nola aukeratu mandrinatzeko makina bat?
Mandrinatzeko makina bat aukeratzeko, zenbait parametro hartu behar dira kontuan, hala nola piezaren mugak eta haren diseinuak. Lortu nahi diren tamaina, tolerantzia eta akabera ere kontuan hartu behar dira. Era berean, garrantzitsua da jakitea piezaren materialak mandrinatzeko makinak jasan ditzakeen; horretarako, materialen gogortasuna, egoera, erresistentzia, burdinurtua den ala ez eta abar aztertzen dira. Baina pieza ez ezik, makina-erremintan egin nahi diren mandrinatze-eragiketak ere aztertu behar dira: arteka-ebaketa, arbastaketa, akabera, barneko eta kanpoko lanak.
Komeni da egingo den mandrinatze-eragiketa bakoitzaren ezaugarriak eta horien parametroak ezagutzea, hala nola ebaketa-abiadura, potentzia edo makinaren eragintza mota. Gainera, kontuan hartu behar da mekanizazio automatikoa egin nahi den, makinak hozgarria behar duen eta zer kopurutan, eta, jakina, zer ezaugarri dituen mandrinatzeko erremintak.
Motak
Lehen deskribatutako baldintzez gain, mandrinatzeko makina bat aukeratzea bilatzen ari zaren makina-erreminta motaren araberakoa da. Mandrinatze-eragiketa sinple bat tornuetan egin daiteke; beraz, lan mota hori askotan egiten ez baduzu, baliteke tornu batekin nahikoa izatea. Bestela, industrian dauden mandrinatzeko makina motetako bat eskura dezakezu.
- Txantiloietarakoak. Txantiloietarako mandrinatzeko makinak txantiloiak, kalibragailuak, matrizeak eta zehaztasun handiko mekanizazioa behar duten piezak kokatzeko eta zulatzeko diseinatu dira. Fresatzeko makina bertikalen antzekoak dira.
- Mandrinatzeko makina bertikala. Makina-erreminta hau mahai horizontal baten gainean biratzeagatik bereizten da.
- Mandrinatzeko makina horizontala. Bertikalek ez bezala, mandrinatzeko makina horizontalek modu geldikorrean funtzionatzen dute. Mutur batean finkatzen den ardatz nagusi horizontal bat dute, eta kontrako noranzkoan lan egiten duen beste ardatz birakari bat.
Mandrinatzeko makinaren atalak
Ikusi dugunez, mandrinatzeko makina mota desberdinak badaude ere, makina horiek elementu komunak dituzte, eta horien kokapena eta banaketa erabiltzen den makina-erreminta motaren araberakoak dira. Mandrinatzeko makinaren elementu komunak hauek dira: mahaia, markoa, bankada, ardatz nagusia, burua eta orga.
Elementu garrantzitsuenetako bat bankada da, makinaren euskarria; sendoa eta egonkorra izan behar du, mekanizazioaren mugimenduak eta bibrazioak indargetzeko gai izan behar baitu. Bankada lurrean bermatzen da, eta hari akoplatuta dago markoa, makina-erremintaren burua eutsi behar duena; buru horretan dago ardatz nagusia.
Gainera, makinak zutabe bertikal bat du, buru motordunaren desplazamendua ahalbidetzen duena. Bestalde, mandrinatzeko makinak pieza-euskarriko mahaia du, mekanizatu beharreko piezak jartzen diren gainazal birakaria. Pieza-euskarriko mahaiari lotuta dago luzetarako orga. Mahaiari lotuta egoteaz gain, bankadako errailen gainean mugitzen da, eta piezaren desplazamendu horizontala ahalbidetzen du.
Mandrinatzeko makinak buruaren gidak ere baditu. Burua bertikalki desplaza daiteke markoaren errailetan zehar, torloju baten bidez. Azkenik, makinak ardatz nagusi bat eta mahaiaren aitzinamenduak transmititzeko beste ardatz bat ditu.