Biomedikuntza medikuntzaren alderdi biologikoetan oinarritutako diziplina da. Haren helburu nagusia gizakiei eragiten dieten gaixotasun eta patologietan dauden prozesu zelularrak, molekularrak, genetikoak eta biokimikoak aztertzea da. Horren guztiaren bidez, gaixotasunak goiz diagnostikatzea eta haiek sendatzeko tratamenduak sortzea bilatzen da.
| Medikua | Ikuspegi praktikoa | Biomedikuak egindako laborategiko emaitzak erabiltzen ditu diagnostikoak egiteko | Sintomen diagnostikoa, pazienteen arreta, tratamendua eta ebakuntzak |
| Biomedikua | Ikerketa | Medikuaren ikerketatik eratorritako datu praktikoak erabiltzen ditu | Lagin biologikoak biltzen ditu gaixotasunak sendatzeari buruzko ikerketak egiteko |
Bestalde, mekanizazioaren industria hasierako objektu bat beste batean eraldatzen duten industria-tekniken prozesua da, forma eta tamaina desberdinekoa.
Bi arlo horiek elkartzen diren puntua da, adibidez, material kirurgikoa egitea, hala nola pintzak, forzepsak edo separagailuak. Kirurgian ezinbestekoak diren tresna horiek altzairu kirurgikozko pieza batetik sortzen dira, eta hainbat makinarekin lantzen da, ebakigailuekin adibidez, erabiltzeko forma egokiena hartu arte.
Era berean, mekanizazioaren industria da protesien arduraduna ere; protesiak gorputzak errefusatzen ez dituen materialekin egiten dira, titanioarekin adibidez, eta jatorrizko atalak ordezteko formak dituzte. Mekanizazioak pieza horien perfekzioa bermatzen du, eta makina horiek gabe lortu ezin litekeen akabera ematen die.
Mikromekanizazioa
Azken urteotan, sektore biomedikoa nabarmen hazi da, eta gaixotasun jakin batzuen sendabidea eta tratamendua bilatzen lagundu duten teknologia berriak txertatu ditu. Hori, besteak beste, mikromekanizazioari esker lortu da.
Mikromekanizazioa teknika bat da, eta haren bidez tamaina txiki-txikiko piezak egiten dira, bestela ezin izango liratekeenak hain zehaztasun handiz egin. Hori makina hoztuetan lan-abiadura handiari esker egiten da, tenperatura egonkorra mantentzeko eta zehaztasun gaindiezina lortu ahal izateko.
Teknika mota honek material oso gogorrekin lan egiten du, hala nola altzairu herdoilgaitzarekin edo titanioarekin, eta haiekin mediku- eta hortz-arlorako piezak sortzen dira. Mikromekanizazioari esker sor daitezkeen gauzen artean daude osteosintesi-torlojuak, artikulazioetako hausturak sendatzeko hezurrari torlojuz lotzen zaizkion plakekin erabiltzen direnak.
Biomedikuntzaren lorpenak mekanizazioari esker
Biomedikuntzak nabarmen egin du aurrera azken urteotan, eta patologiak sendatzea eta tratatzea errazten duten aurrerapen ugari lortu ditu. Aurrerapen horiek lortu ahal izateko, fabriketan mekanizazio-prozesuen bidez sortzen den aparatu teknologiko konplexuz hornitutako laborategiak behar dira. Beraz, esan daiteke azken belaunaldiko ekipamendu zientifikoa sortzeko mekanizazio-prozesu horiek gabe ezinezkoa litzatekeela aurrera egitea ikerketa-arloetan, hala nola ama-zelulen arloan, hain garrantzitsua dena.
Ama-zelulak
Ama-zelulei buruzko ikerketari esker, zientzialariek zelula helduak enbrioian dauden ama-zelula bihurtzea lortu zuten. Ama-zelulak bereizi gabeko zelulak dira. Horrek esan nahi du beste zelula mota batzuk bihur daitezkeela, hala nola odol-zelulak edo nerbio-zelulak. Hortik abiatuta, ikerketak transdiferentziaziora iritsi ziren; hau da, mota bateko zelula bat beste mota bateko zelula bihur daitekeen prozesura. Adibidez, azaleko zelula bat garuneko zelula bihur daiteke.
Lorpen hau oso garrantzitsua da, hortik abiatuta odoleko gaixotasunak sendatu edo erredurak konpondu baitaitezke. Gainera, denborarekin oso litekeena da gaur egun sendaezinak diren gaixotasun batzuk sendatu ahal izatea, hala nola Alzheimerra.
Gaixotasun horrek garuneko nerbio-zelulei eragiten die eta dementzia eragiten du. Gaur egun haren jatorria ondo ezagutzen ez den arren, teoria baten arabera garunean bi proteinaren gehiegikeria dago haren atzean. Proteina horiek, beta amiloidea eta tau izenekoek, korapiloak sortzen dituzte garunean, eta horiek zelulen arteko komunikazioa oztopa dezakete.
Gaur egun, ama-zelulak gaixotasun honen ikerketan erabiltzen ari dira, Alzheimerra duten pertsonen karga genetiko bera duten neuronak ekoiztuz. Horrela, tau eta beta amiloide proteinen gehiegikeria murriztuko luketen sendagaiak sor litezke.
Hori guztia gorabehera, oraindik asko dago aurrera egiteko eta deskubritzeko arlo honetan. Hala ere, zientziaren adar honek aurrerapauso handiak egiten ari da, besteak beste, mekanizazioaren industriari esker; izan ere, industria horrek errealitate bihurtzen ditu zientzialarien nahiak eta ametsak, bai eta pazienteen beharrak ere.