CNC fresatzeko makinak fresatzeko makina konbentzionalen bertsio hobetua dira. Makina hauek modernoagoak eta moldakorragoak dira, onura handiak eskaintzen dizkiete mekanizazio-tailerrei eta ekoizpen-prozesuak azkartzen dituzte. Zer atal ditu makina honek? Nolakoa da CNC fresatzeko makinaren burua?
CNC fresatzeko makinaren eta fresatzeko makina konbentzionalaren arteko aldea
Ordenagailu bidezko zenbakizko kontroleko (CNC) fresatzeko makina konbentzionalaren antzekoa da, baina aldea da operadorearen esku-hartze txikiena behar duela; hau da, modu automatizatuan lan egin dezake makinaren ordenagailuari esker. Izan ere, gaur egun fresatzeko makina konbentzionala CNC makina bihurtzeko kit bereziak aurki daitezke.
Fresatzeko makina tradizionalarekin antzekotasun handiak dituenez, bi makina motak pieza mugikor berberez osatuta daude:
- Mahaia
- Burua
- Ardatz nagusia
- Zeharkako eta alboko desplazamendu-orgak
Hala ere, CNC fresatzeko makinek kontrol-paneleko ordenagailu bati esker funtzionatzen dute, eta fresatzeko makina konbentzionalek, berriz, palanken bidez. Hain zuzen ere, ordenagailu hori da makinaren piezarik garrantzitsuena. Ordenagailu bidezko zenbakizko kontrolari (CNC) esker, atalak (ardatz nagusia, orgak, mahaia, CNC fresatzeko makinaren burua, etab.) automatikoak dira. CNCari esker, fresatzeko makina programa daiteke, eta ordenagailuak adierazten die makinaren atalei zer egin behar duten.
Horrela, adibidez, piezaren diseinuaren arabera, CNC fresatzeko makinaren burua mekanizatu beharreko piezaren edozein ataletara irits daiteke; horri esker, makinak oso txikiak eta diseinu konplexukoak diren piezak ekoiz ditzake. Gainera, serieko ekoizpena ahalbidetzen du. Horregatik, CNC fresatzeko makinen ezaugarriak dira produktibitatea hobetzea, oso zehatzak, azkarrak, moldakorrak eta seguruak izatea eta, batez ere, errepikakortasuna eta hondakinen (txirbilen) murrizketa eta optimizazioa.
CNC fresatzeko makinaren atalak
Lehen esan dugu CNC fresatzeko makinek eta fresatzeko makina konbentzionalek atal mugikor berberak dituztela. Hala ere, fresatzeko makina hauek CNCaren berezko osagaiak ere badituzte. Ordenagailu bidezko zenbakizko kontroleko fresatzeko makinaren atalak hauek dira:
- Zutabea
- Fresa
- Fresatze-mahaia
- Fresatzeko makinaren burua (CNC)
- Kontrol-panela/ordenagailua
- Lan-pieza
- Likido hozgarriaren hodiak
- Desplazamendu-ardatzak eta ardatz osagarriak
CNC fresatzeko makinaren burua
Fresatzeko makinaren atal garrantzitsuenetako bat burua da, pieza mekanizatzeko biratzen dena. CNC fresatzeko makinetan, burua orientagarria da eta ardatz nagusiaren motorra du barnean, eta horri esker lana askoz azkarragoa eta zehatzagoa da. Gainera, prozedura automatizatuta dagoenez, ordenagailuak adierazten dio buruari zer erreminta erabili.
Izan ere, fresatzeko makina batek mekanizazio-prozesu ugari egin ditzake, hala nola zulaketa eta hainbat fresaketa mota, besteak beste. Adibidez, pieza bati forma emateko, CNC fresatzeko makinaren buruak fresa bat erabiliko du. Fresa da gehien erabiltzen den ebaketa-erreminta, eta makinaren orgen mugimenduari esker piezaren gainazalera irits daiteke eta txirbilak kendu pieza profilatu arte. Zer gertatzen da pieza zulatu nahi bada? CNCari esker, buruak badaki ez duela fresa bat erabili behar, barena baizik. Makinaren modeloaren eta ezaugarrien arabera, fresaren eta barenaren arteko aldaketa segundo gutxitan egin daiteke, eta makinak ez dio inoiz lan egiteari uzten.
Desplazamendu-ardatzak
Makina-erreminta bakoitzak plano kartesiar batean funtzionatzen du; horrek zehazten ditu mahaiak gainean finkatutako piezarekin egin ditzakeen mugimendu motak. CNC fresatzeko makinen ezaugarria da bost ardatz desberdinetan ere mugi daitezkeela. Makina honen ardatz nagusiak X, Y eta Z dira, eta ardatz osagarriak, berriz, A eta B. Nabarmendu behar da CNC fresatzeko makina guztiak ez direla gai ardatz horietan mugitzeko; makinaren modeloaren araberakoa da.
CNC fresatzeko makinaren ardatzak hauek dira:
- X ardatza. Ardatz hau horizontala da, eta, aldi berean, landu beharreko piezarekiko paraleloa. Lan-mahaiaren luzetarako mugimenduarekin ere lotzen da.
- Y ardatza. Mugimendua egiten du plano horizontalean, eta fresatze-mahaiarekiko zeharkakoa dela esaten da.
- Z ardatza. Fresa ardatz horretan jartzen da, eta, ebaketa-erreminta hartzen duenez, mekanizazioa egiteko behar adinako potentzia du. Ardatz honek posizio desberdinak har ditzake CNC fresatzeko makinaren buruaren arabera. Buruaren mugimendu bertikalarekin lotzen da.
- A eta B ardatz osagarriak. Pieza edozein posiziotan jartzeko aukera ematen dute, eta horri esker CNC fresatzeko makinaren burua piezaren edozein angelutara irits daiteke.