Mekanizazio-zentro horizontala hainbat lan modu automatikoan egiteko berariaz diseinatutako makina da. Ordenagailu bidezko zenbakizko kontrolaren (CNC) bidez funtzionatzen du; hau da, lan-prozesu automatizatua egiten du zehaztasuna, doitasuna eta produktibitatea irabazteko.
Mekanizazio-zentro horizontalen tamaina, forma eta automatizazio-maila ugari daude. Makina horien guztien ezaugarri komuna da lana modu automatizatuan egiten dutela. Horrela, ekoizpena bizkortu egiten da, operadoreak lan-prozesuan piezak manipulatu behar izan gabe.
Mekanizazio-zentro horizontal batek egiten dituen lanak
Mekanizazio-zentro horizontalak pieza konplexuen mekanizazio automatikoko hainbat lan egiten ditu. Lortzen den produktibitatea hain da handia, ezen serieko fabrikaziorako erabil baitaiteke. Izan ere, era guztietako pieza metalikoetan txirbil-harroketako edozein lan egin dezake.
Lan horiek pieza handiekin egin ohi dira. Mekanizazio-zentro horizontalak pieza angelu desberdinetan mugi dezake, egin beharreko lanaren arabera. Makinak ebaketa-erreminta sorta bat du, hala nola txiribiletak, fresak edo bestelako ebakigailuak, biratu edo presioa egiten dutenak txirbila kentzeko, zuloak egiteko, lautzeko, etab.
Zulaketa
Zulaketa mekanizazio-prozesu bat da, eta haren bidez zulo itxurako ebaketa egiten da piezaren materialean, biraka dabilen txiribileta baten bidez. Piezan egiten den zuloak aurrez ordenagailu bidezko zenbakizko kontrolean (CNC) ezarritako neurriak izan ditzake.
Artekaketa
Artekaketa mekanizazio horizontaleko lan bat da, eta haren bidez hainbat arteka zilindriko egiten dira piezan. Arteka horien zabalera eta sakonera aurrez adierazten dira CNC kontrol-panelaren bidez. Beraz, makinak aurrez ezarritako arteka-zabalera eta -sakonera batetik abiatuta exekutatuko ditu aginduak.
Hari-ebaketa
Mekanizazio horizontaleko lan honen helburua piezan hari bat sortzea da. Lan hori barrualdean zein kanpoaldean egin daiteke, eta kanpokoa da errazena. Kontuan hartu behar da aurrerapen-abiadurak hariaren pausoaren berdina izan behar duela. Barneko haria tornuz egitean, berriz, txirbilaren hustuketa hartu behar da kontuan, lana hobeto egiteko.
Ebakitzea
Ebakitzea mekanizazio-zentro horizontal batek egin dezakeen beste lan bat da. Kasu honetan, makinak piezaren zati bat ebaki edo bereizten du. Oro har, pieza handietan egiten den lana da, eta makinaren aldetik ahalik eta zehaztasun eta segurtasun handiena eskatzen du. Bestela, pieza baztertu beharko litzateke.
Otxabukaketa
Otxabukaketa mekanizazio-lan bat da, eta haren bidez zehaztasun handiko zuloak egiten dira. Horretarako, ahoanitzeko erreminta bat erabiltzen da, oso zulo zehatzak eta doiak lortzeko. Operadoreak CNC kontrol-panelean sartuko ditu ebaketa-sakonera, abiadura eta aurrerapena adierazteko koordenatuak.
Profilatzea
Pieza batzuek oso arteka konplexuak eta irisgarritasun zailekoak dituzte. Gainazaleko akabera onena emateko, profilatzea erabiltzen da. Aurreko lanetan bezala, profilatzeko koordenatuak kontrol-panelaren bidez sartzen dira makinan. Oso garrantzitsua da, horren aurretik, nahi den profil-diseinua ondo aztertzea, emaitzarik onenak lortzeko.
Aurpegiratzea
Aurpegiratzea da makinak piezaren muturra mekanizatzen duen lana. Piezaren aurrealdeko aurpegian gainazal laua lortzen da. Pieza biraka mugitzen da, eta aurpegi batetik zein bestetik aurpegira daiteke. Hala bada, buelta eman beharko zaio aurpegietako batean aurpegiratzea amaitzen denean.
Moletatzea
Pieza bat moletatzea haren gainazalean egiten den mekanizazio-lana da, heltzea errazteko. Hiru modutara egin daiteke: deformazioz, estrusioz edo ebaketaz. Mekanizazio-zentro horizontal gehienek ebaketaz egiten dute, metodo horrekin sakonera handiagoa eta gainazaleko akabera hobea lortzen baitira. Gaur egungo mekanizazio-zentro horizontal batzuek hainbat lan egin ditzakete makina bakar batean. Beraz, funtzio anitzeko makinak dira, eta produktibitate handiagoa, akaberetan eraginkortasun eta zehaztasun handiena eta kostuetan aurrezpen handia eskaintzen dituzte.